أنا بكرهك ... أنا ما بكرهك

ﺍﻧﺎ ﺑﻜﺮﻫﻚ

ﻧﻀﺎﻝ ﺣﺴﻦ ﺍﻟﺤﺎﺝ

ﺑﺲ ﺑﻜﺮﻫﻚ .. ﺍﻧﺎ ﺑﻜﺮﻩ ﺍﻟﻴﻮﻡ ﺍﻟﺼﻨﻊ ﻗﻠﺒﺎً

ﻳﻜﻮﺭﻙ ﻭﻳﻨﺪﻫﻚ

ﺍﻧﺎ ﺑﻜﺮﻩ ﺍﻟﻮﻃﻦ ﺍﻟﺒﻠﻢ ﺷﺮﻑ ﺍﻟﻐﺮﺍﻡ ﺍﻟﻤﻨﺘﻬﻚ

ﻣﻦ ﻳﺎﺗﻮﺍ ﺑﺎﺏ ﻃﻠﻴﺖ ﻋﻠﻰ ﻣﺎ ﻛﻨﺖ ﺍﺻﻼ ﺑﺸﺒﻬﻚ

ﺍﻧﺎ ﺑﻜﺮﻫﻚ

ﺍﻧﺎ ﺷﻠﺖ ﺭﻳﺪﻙ ﻓﻰ ﺍﻟﻘﻠﻴﺐ ﻭﺳﻘﻴﺘﻪ ﻣﻦ ﺩﻡ ﺍﻟﻌﺮﻭﻕ

ﺻﻨﻘﻌﺖ ﺩﻟﻴﺖ ﺍﻟﻨﺠﻢ ﺩﻧﻘﺮﺕ ﻛﺒﻴﺖ ﻧﻮﺭ ﻭﺷﻮﻕ

ﻭﻋﺼﺮﺕ ﻣﻮﻳﺔ ﺍﻻﻧﺘﻈﺎﺭ ﺧﺘﻴﺘﻪ ﻓﻰ ﻭﺟﻊ ﺍﻟﺤﺮﻭﻕ

ﻛﺎﻥ ﺍﻟﻨﺘﻴﺠﺔ ﺗﺒﻴﻊ ﻫﻮﺍﻯ ﻭﺍﺭﻳﺘﻮ ﻛﺎﻥ ﺳﻮﻳﺘﻠﻮ ﺳﻮﻕ

ﺍﻧﺎ ﺑﻜﺮﻫﻚ

ﻣﻦ ﻭﻳﻦ ﺍﺟﻴﺐ ﻟﻴﻚ ﺍﻟﺪﻣﻮﻉ

ﻣﻦ ﻭﻳﻦ ﺍﺻﻨﻘﺮ ﺣﻴﻞ ﻛﻼﻡ ﺍﻣﻨﻴﺎﺕ ﻗﻠﺒﻪ ﺍﻟﺮﺟﻮﻉ

ﻣﻦ ﻭﻳﻦ ﺍﺫﺍ ﻫﺘﻚ ﺍﻟﻈﻼﻡ ﺣﻴﻞ ﺧﻴﻠﻰ ﺍﻟﻘﺎﻟﻚ ﺷﻤﻮﻉ

ﻟﻜﻨﻰ ﻣﺠﺒﻮﺭ ﺍﻃﺮﺩﻙ ﻭﺍﻗﻔﻞ ﻭﺭﺍﻙ ﺑﺎﺏ ﺍﻟﻄﻠﻮﻉ

ﺍﻧﺎ ﺑﻜﺮﻫﻚ

ﺷﺪﻳﺖ ﺭﺣﺎﻻﺗﻰ ﻭﻣﺸﻴﺖ

ﻭﻗﺘﻴﻦ ﻫﺘﻚ ﺣﻴﻠﻚ ﻫﻮﺍﻯ ﺍﺭﺗﺤﺖ ﻓﻰ ﻣﻮﺟﻰ ﻭﺭﺳﻴﺖ

ﻻ ﺣﺮﻙ ﺍﻟﻤﻮﺝ ﺍﻟﺒﺤﺮﻻ ﺻﺪ ﻗﻠﺒﻲ ﻭﻻ ﻗﺴﻴﺖ

ﻟﻜﻦ ﻃﻠﻌﺘﻪ ﺧﻴﺎﻝ ﻋﺸﻢ ﺿﻤﺦ ﺭﺅﻯ ﺍﻟﻮﺟﻊ ﺍﻟﻤﻤﻴﺖ

ﺍﻧﺎ ﺑﻜﺮﻫﻚ

ﻗﺪﺭ ﺍﺷﺘﻬﺎﻱ ﺃﻧﺎ ﺑﻜﺮﻫﻚ

ﻗﺪﺭ ﺍﻟﻐﺮﺍﻡ ﺍﻟﻜﺎﻥ ﺯﻣﺎﻥ ﻛﺎﺑﺖ ﻣﺴﺎﻣﺎﺗﻲ ﻭﻫﻮﺍﻱ

ﻗﺪﺭ ﺍﻧﻲ ﻣﺎ ﻟﻮﺛﺖ ﺑﻴﻚ ﻛﺮﻳﺎﺕ ﺷﺮﺍﻳﻴﻨﻲ ﻭﺩﻣﺎﻱ ..

ﻗﺪﺭ ﺍﻧﻰ ﻏﻨﻴﺘﻚ ﻏﻨﺎﻯ

ﻣﻦ ﻭﻳﻦ ﺩﺧﻠﺖ ﻋﻠﻰ ﻣﺪﻥ ﺷﺎﺧﺖ ﻣﻦ ﺍﻟﻮﺟﻊ ﺍﻻﻟﻴﻢ

ﻣﻦ ﻭﻳﻦ ﻃﺮﻗﺖ ﺟﺪﺍﺭ ﻗﻠﺐ ﻟﻘﺢ ﻫﻮﻯ ﺍﻟﻌﺸﻖ ﺍﻟﻌﻘﻴﻢ

ﻣﻦ ﻭﻳﻦ ﺳﺨﺖ ﺷﻤﺴﻚ ﻋﻠﻰ ﻛﺎﻧﺖ ﺳﻤﺎﻯ ﻣﻠﻴﺎﻧﻪ ﻏﻴﻢ

ﻓﺘﻖ ﺟﺮﺍﺣﺎﺗﻰ ﻭﺍﻣﺶ ﺧﻠﻴﻨﻰ ﻓﻰ ﻟﻬﺐ ﺍﻟﺠﺤﻴﻢ

ﺍﻧﺎ ﺑﻜﺮﻫﻚ

ﻗﺪﺭ ﺍﻟﻤﻮﺍﺳﻢ ﺍﻟﺸﺎﺩﺓ ﺧﻴﻞ ﺍﻟﺮﻳﺪ ﻋﻠﻴﻚ .. ﺃﻧﺎ ﺑﻜﺮﻫﻚ

ﻗﺪﺭ ﺍﻟﻤﺼﺎﻳﺐ ﺍﻟﺤﺎﺭﺳﺔ ﺑﻮﺍﺑﺎﺕ ﻣﺠﻴﻚ .. ﺍﻧﺎ ﺑﻜﺮﻫﻚ

ﻧﻔﺲ ﺍﻟﻤﺴﺎﻓﺔ ﻭﺣﺠﻢ ﻗﻠﺒﻲ ﺍﻟﻜﺎﻥ ﺗﻤﻠﻲ ﺑﻴﺸﺘﻬﻴﻚ ﺑﻘﻰ

ﺑﻜﺮﻫﻚ

ﺍﺗﻮﻛﻞ ﺍﺭﺣﻞ ﻣﻨﻰ ﻓﻮﺕ

ﺣﺮﻣﺎﻥ ﻋﻠﻰ ﻗﻠﻤﻰ ﺍﻟﻜﻼﻡ ﻛﺎﻥ ﻏﻴﺮﻙ ﺍﺟﺘﺎﺣﻮ ﺍﻟﺴﻜﻮﺕ

ﺧﻠﻴﻬﻮ ﻗﻠﺒﻰ ﺍﻻﻧﺪﻓﻦ ﺗﻨﺴﺞ ﻋﻠﻴﻪ ﺍﻟﻌﻨﻜﺒﻮﺕ

ﺍﻭ ﺧﻠﻰ ﻣﻦ ﺑﻌﺪﻙ ﺍﻣﻮﺕ

ﺍﻟﻤﻮﺕ ﺍﺧﻴﺮ ﻣﻦ ﺍﻧﻰ ﺍﻓﻀﻞ ﻓﻰ ﺭﺣﺎﺑﻚ ﻭﻓﻰ ﺭﺟﺎﻙ

ﺍﻧﺎ ﻛﻨﺖ ﻟﻮ ﻏﺎﺏ ﺍﻟﻘﻤﺮ ﺩﺍﻳﻤﺎ ﺑﻀﻮﻯ ﻇﻼﻡ ﺩﻧﺎﻙ

ﻭﺍﻧﺎ ﻛﻨﺖ ﻟﻮ ﻏﻴﻤﻚ ﺭﺣﻞ ﺑﻄﻠﻊ ﻋﺸﺎﻥ ﺍﺳﻜﻦ ﺳﻤﺎﻙ

ﻭﺍﻧﺎ ﻛﻨﺖ ﻟﻮ ﺑﺮﺩﻙ ﻧﺰﻝ ﺑﻮﻗﺪ ﺻﻮﺍﺑﻌﻰ ﻟﻬﻴﺐ ﺣﺪﺍﻙ

ﻟﻜﻦ ﻣﻨﻮ ﺍﻟﻘﺪﺭ ﻛﺪﻩ

ﻭﺍﻟﻠﻪ ﻟﻮ ﺍﻧﺎ ﻓﻰ ﻣﺤﻠﻚ ﺑﻨﺴﺞ ﺍﻟﺸﻤﺲ ﺍﺣﺘﺮﺍﻡ ﻭﺍﻫﺪﻳﻬﺎ

ﻟﻴﻚ ﻣﺘﻤﺪﺩﻩ

ﺑﻔﺘﺢ ﻛﺮﺍﺭﻳﺲ ﺍﻟﻜﻼﻡ ﻭﺍﺧﺘﺎﺭ ﺣﺮﻭﻓﻰ ﻭﺍﺟﺮﺩﻩ

ﻭﺍﻧﺒﺶ ﻗﺒﻮﺭ ﺍﻟﻤﺴﺘﺤﻴﻞ ﻛﻠﻤﺎﺕ ﺷﻜﺮ ﻣﺘﻔﺮﺩﻩ

ﻟﻜﻦ ﺧﺴﺎﺭﺓ ﻋﻠﻰ ﻗﻠﺐ ﺣﺒﺎﻙ ﺑﻼ ﻣﺎﻳﻌﺮﻓﻚ

ﺍﻧﻌﻞ ﺍﺑﻮ ﺍﻟﻘﻠﻢ ﺍﻟﻌﻠﻰ ﺩﻓﺘﺮ ﻏﻨﺎﻙ ﺩﻣﻪ ﺍﻧﺴﻔﻚ

ﺍﻧﻌﻞ ﺍﺑﻮ ﺍﻟﺸﻌﺮ ﺍﻟﻐﺸﺎﻧﻰ ﻭﻏﻨﻰ ﻓﻴﻚ ﻭﺃﻟﻔﻚ

ﻣﻠﻌﻮﻥ ﻏﻨﺎﻯ ﻣﺎ ﺍﻣﺘﻄﻴﺖ ﺧﻴﻠﻰ ﻭﺑﻘﻴﺖ ﺍﺗﺄﺳﻔﻚ

ﺑﺘﺄﺳﻔﻚ ﻭﻗﺘﻴﻦ ﻋﻴﻮﻧﻰ ﻳﺴﻮﻗﻦ ﺍﻟﺸﻮﻕ ﻻﻧﺘﻈﺎﺭﻙ

ﻟﻤﺎ ﻟﻴﻠﻰ ﻳﺴﻮﻕ ﻣﺤﺎﺳﻨﻪ ﻭﻳﻨﻬﺰﻡ ﻋﻨﺪﻙ ﻧﻬﺎﺭﻙ

ﻟﻤﺎ ﻣﺎ ﺍﺑﻜﻰ ﺍﻧﻬﺰﺍﻣﻰ ﻋﺸﺎﻥ ﺍﺑﺎﺭﻙ ﺍﻧﺘﺼﺎﺭﻙ

ﻟﻤﺎ ﻛﻮﻛﺒﻰ ﺳﺎﺏ ﻣﺪﺍﺭﻭ ﻭﺭﺣﻞ ﻋﺸﺎﻥ ﻳﺴﻜﻦ ﻣﺪﺍﺭﻙ

ﻛﻨﺖ ﻣﺎﻟﻲ ﺯﻣﺎﻥ ﻭﻣﺎﻟﻚ .. ؟

ﻟﻜﻦ ﻭﺣﺎﺗﻚ ﺑﻜﺮﻫﻚ

ﻧﺪﻣﺎﻥ ﻋﻠﻰ ﻋﻤﺮﺍً ﻣﻌﺎﻙ ﺿﻴﻌﺘﻮ ﻓﻰ ﻏﻔﻠﺔ ﺯﻣﻦ

ﻧﺪﻣﺎﻥ ﻋﻠﻰ ﺩﻣﻌﺎً ﺳﻜﺒﺘﻮ ﻋﻠﻰ ﺭﺿﺎﻙ ﺑﻼ ﺗﻤﻦ

ﺍﻧﺎ ﻛﻨﺖ ﺑﺤﻠﻢ ﻓﻰ ﻭﺟﻮﺩﻙ ﻳﻨﻜﺴﺮ ﺧﺎﻃﺮ ﺍﻟﺸﺠﻦ

ﻟﻜﻦ ﺭﺿﺎﻯ ﻋﻠﻴﻚ ﻋﺸﻢ ﺍﺑﻠﻴﺲ ﻗﺼﺎﺩ ﺟﻨﺔ ﻋﺪﻥ

ﺍﻧﺎ ﺑﻜﺮﻫﻚ

ﻛﻞ ﻣﺎ ﻳﻄﻮﻝ ﻟﻴﻠﻰ ﻭﻳﻮﺍﺗﻴﻬﻮ ﺍﻟﻌﺬﺍﺏ .. ﺍﻧﺎ ﺑﻜﺮﻫﻚ

ﻛﻞ ﻣﺎ ﺍﻟﻘﻠﻢ ﻳﺮﻛﺐ ﻣﺼﺎﻋﺐ ﺍﻟﺪﻧﻴﺎ ﻳﻤﺸﻰ ﻋﻠﻰ ﺍﻟﻜﺘﺎﺏ

ﺍﻧﺎ ﺑﻜﺮﻫﻚ

ﻛﻞ ﻣﺎ ﺍﻟﻔﺮﺍﻕ ﻛﺘﻞ ﻣﻀﺎﻣﻴﻦ ﺍﻟﻌﺸﻖ ﺳﺪﺍﻟﻮ ﺑﺎﺏ

ﺍﻧﺎ ﺑﻜﺮﻫﻚ

ﻗﺪﺭ ﺍﻟﻌﻴﻮﻥ ﻣﺎ ﺗﻠﺒﺲ ﺍﻟﺘﻮﺏ ﺍﻟﺰﺭﺍﻕ ﺗﺘﻮﺿﻰ ﻣﻮﻳﺔ ﺍﻻﻧﺘﺤﺎﺏ

ﺍﻧﺎ ﺑﻜﺮﻫﻚ

ﻣﻦ ﻛﻞ ﺑﺎﺏ ﺍﻧﺎ ﺑﻜﺮﻫﻚ ﻭﺍﺗﻮﻛﻞ ﺍﺭﺣﻞ ﻣﻦ ﺟﻮﺍﻯ

ﻏﻠﻄﺎﻥ ﺍﺫﺍ ﻗﻠﺒﻚ ﻫﺪﺍﻙ ﻗﺎﻝ ﻟﻴﻚ ﺣﺎﺗﻔﻀﻞ ﻏﻨﺎﻯ

ﻏﻠﻄﺎﻥ ﺍﺫﺍ ﻋﻘﻠﻚ ﺭﺿﺦ ﻟﻰ ﻇﻦ ﻳﻘﻮﻝ ﻟﻴﻚ ﺍﻧﻚ ﻫﻮﺍﻯ

ﻭﺍﻟﻠﻪ ﻣﺎﻓﺎﺭﻕ ﻣﻌﺎﻯ ﺍﻧﺎ ﻛﻨﺖ ﻧﺎﻭﻯ ﺍﺟﻤﻠﻚ ﺑﺲ ﻛﻨﺖ ﻧﺎﻭﻯ

ﺍﺟﻤﻠﻚ

ﻭﺍﻣﺴﻚ ﻣﻀﺎﻣﻴﻦ ﺍﻟﻠﻐﺎﺕ ﻣﻦ ﻓﻴﺾ ﺣﺮﻭﻓﻰ ﺍﻛﻤﻠﻚ

ﺗﺮﺣﻞ ﻋﻠﻰ ﺩﺭﺏ ﺍﻟﻌﺸﻢ ﺑﻰ ﺯﺍﺩ ﻫﻮﺍﻯ ﺃﺣﻤﻠﻚ

ﻭﻗﺘﻴﻦ ﻳﺨﺶ ﻗﻠﺒﻚ ﺟﺮﺍﺡ ﺍﻗﻄﻊ ﻗﻠﻴﺒﻰ ﻭﺍﺩﻣﻠﻚ

ﻧﺪﻣﺎﻥ ﻣﻨﻮ ؟

ﺃﻧﺎ ﻏﺎﻳﺘﻮ ﻣﺎ ﻧﺪﻣﺎﻥ ﻋﻠﻴﻚ ..

ﺃﺗﻮﻛﻞ ﺃﺭﺣﻞ ﺑﺮﺍﻙ ﻋﻴﺶ ﺍﻟﻌﺬﺍﺏ ﺍﻟﺒﺎﻗﻰ ﻓﻴﻚ

ﻭﻟﻮ ﻗﻠﺒﻚ ﺍﺗﺠﺮﺃ ﺭﺟﻊ .. ﺣﻘﻚ ﺗﻠﻮﻣﻮ ﻋﻠﻰ ﻣﺠﻴﻚ

ﻋﺸﺎﻥ ﺍﻧﺖ ﻗﻠﻴﺒﻰ ﻣﻠﻴﺘﻮ ﺩﻡ

ﻳﺎﺥ ﻗﻠﺒﻰ ﺍﻧﺖ ﻣﻠﻴﺘﻮ ﺩﻡ

ﻣﺎﻋﺎﺩ ﻟﻮ ﺑﺎﻗﻰ ﻳﺴﻴﺒﻮ ﻟﻴﻚ

ﻋﻠﻰ ﻛﻞ ﺣﺎﻝ ﺍﻧﺎ ﺑﻜﺮﻫﻚ

ﻋﺪﺩ ﺍﻟﺤﺼﻰ ﻭﻋﺪﺩ ﺍﻟﺮﻣﺎﻝ ﺍﻧﺎ ﺑﻜﺮﻫﻚ

ﻋﺪﺩ ﺍﻟﺼﻮﺍﺏ ﻭﺍﻻﺣﺘﻤﺎﻝ ﺃﻧﺎ ﺑﻜﺮﻫﻚ

ﻋﺪﺩ ﺍﻟﺤﻘﺎﻳﻖ ﻭﺍﻟﺨﻴﺎﻝ ﺃﻧﺎ ﺑﻜﺮﻫﻚ

ﻋﺪﺩ ﺍﻟﺸﻨﺎ ﻭﻋﺪﺩ ﺍﻟﺠﻤﺎﻝ ﺃﻧﺎ ﺑﻜﺮﻫﻚ

ﻋﺪﺩ ﺍﻟﺸﻌﺮ ﻣﺎ ﺳﻦ ﺳﻴﻒ ﺍﻻﺭﺗﺠﺎﻝ ﺃﻧﺎ ﺑﻜﺮﻫﻚ

ﻋﺪﺩ ﺍﻻﺟﺎﺑﺎﺕ ﻭﺍﻟﺴﺆﺍﻝ ﺃﻧﺎ ﺑﻜﺮﻫﻚ

ﻋﺪﺩ ﺍﻟﻤﻤﻜﻦ ﻭﺍﻟﻤﺤﺎﻝ ﺃﻧﺎ ﺑﻜﺮﻫﻚ

ﻋﺪﺩ ﻣﺎ ﺯﻣﺎﻥ ﻗﺖ ﻟﻴﻚ ﺗﻌﺎﻝ ﺍﻧﺎ ﺑﻜﺮﻫﻚ

ﻣﺴﺘﻮﺭﺓ ﺣﺎﻟﻰ ﻭﺭﺍﻙ

ﻭﻓﻮﺕ ﻳﺎ ﺩﺍﺑﻮ ﻟﻴﻠﻚ ﻫﻤﻮ ﻃﺎﻝ

ﻋﻠﻰ ﻛﻞ ﺣﺎﻝ

ﺃﻧﺎ ﺑﻜﺮﻫﻚ